Narsarsuup Islandillu akornanni aasakkut timmisartuussisarnermut isumaqatigiissut ukiuni pingasuni atasimasoq, aggustimi atorunnaassaaq, nutaamillu suli isumaqatigiissusiortoqarsimanngilaq.
Tamanna pissutigalugu kujataani takornariaqartitsinermut suliaqartut, Destination South Greenland, nutaamik isumaqatigiissusiortoqarnissaa ujartorpaat.
- Takornariat eqqarsaatigalugit isumaqatigiissusiortoqarnissaa isumannaartariaqarparput, Destination South Greenlandip pisortaa Tina Jensen ullumi radioaviisimut oqarpoq.
Islandimi angallannermut ministeriaqarfik taama aamma noqqaassuteqarsimanerarneqarpoq, attaveqarnermulli naalakkersuisup Jens Napaattuup ilisarinngilaa, oqarlunilu suliaq ingerlanneqartoq:
- Naluara Islandimiit ujartorneqartoq pissusissamisoornersoq oqaatigissallugu, peqqutigalugu Islandimiut angallannermut ministeriat qanimut isumasioqatigalugu suliaq ingerlanneqarmat, Jens Napaattooq oqarpoq.
- Naluneqanngitsutuut maannakkut angallannermut nutaamik aaqqissuussinissamut isumaqatigiissutissamut neqeroorutit maajip 17-ianni killeqarput, aamma isumaqatigiinniarnerit soqutiginaateqartut assigiinngitsut allat, kujataata pilersorneqarsinnaaneranut maajip qeqqata missaani aalajangiiffigineqartussat, kujataani takornariaqartitsiviup Destination South Greenlandip siulersuisuisa siulittaasuannut anngunneqareerput, Jens Napaattooq tunngavilersorpoq.
Kujataani takornariaqartitsiviup, Destination South Greenlandip pisortaa Tina Jensen sisamanngornermi ualikkut ardioavisimut oqarpoq nutaamik isumaqatigiissusiortoqanngippat 11 million koruunit annaaneqarsinnaasut.
