Napaattooq pisiniarfimmi pisortanngussaaq

Naalakkersuisunut ilaasortaasimasoq Siumumeersoq Jens Napãtok´ KNI-p Upernavimmi pisiniarfiani novemberip aallaqqaataani pisortatut atorfinitsinneqarpoq. Atuagagdliutini ullumi saqqummertuni tamanna allaaserineqarpoq.

Jens Napãtok´ Inatsisartuni ilaasortaanerminit tunuarnissaa taamaalilluni ilimanarsinnaavoq.

KNI-p pisortaanera Gerhardt Petersen oqarpoq, atorfimmut qinnuteqartut pingasut akornanni Jens Napãtok´ piukkunnarnerpaatut nalilerneqarsimasoq, kammalaasersortoqarsimanngitsorlu erseqqissaatigaa.

Jens Napãtok´-uup ilassinnissutinik atornerluisimanini pillugit naalakkersuisunut ilaasortatut kiisalu Siumumi siulittaasup tulliatut tunuarpoq. Taamaannerali ernummatiginagu KNI-p pisortaanera erseqqissaavoq.

- KNI-mi aningaasaqarneq bilagillu aqulluarsinnaanerugivut isumaqarpunga, ullut tamaasa nalunaarutisisarpunga, kontonut assigisaannullu inissiisarneq isumagilluartarpavut. Taamaattumik nutaamik periarfissinneqartariaqarpoq. Gerhardt Petersen oqarpoq.

Aamma isumaqarpoq, Jens Napãtok´ Upernavimmi sulilluaruni Illoqqortoormiuni pisortanngorsinnaassasoq.