Napaattooq: Nannut 30-it tammajuitsussatut

januaarip 17-at 2005 15:52

- Tulluusimaarutigilluinnarpara tammajuitsussarsiniarluni nannunniartoqarsinnaanera, naalakkersuinikkut ammaanniarneqalermat.

Maannakkut piniartut nanoq ataaseq agguaqatigiissillugu 10.000 koruunit missaanni aningaasarsissutigisarpaat, tammajuitsussarsiniarlunilu nannunniartoqartalerpat, quleriaataat isertitsissutigisinnaalissavaat,

Avatangiisinut pinngortitamullu Naalakkersuisoq, Jens Napaattooq oqarpoq.

Piniartut pisarisartagaat tamavimmik nalunaarsorneqartarmata, ukiuni qulikkuutaani kingullerni pisarineqartartut qassiuneri ersarilluinnartumik pigineqartut aamma oqaatigalugu.

Taakkulu qulerarterutaat tammajuitsussatut pisarineqarsinnaassangatippai, tassalu nannut 30-t missaanniittut ukiumut pisarineqarsinnaassangatillugit.

Nannunik kisitsisoqassappat 4 mio.kr.-nit sinnerlugit naleqassasoq, Pinngortitaleriuffiup pisortaata Klaus Nygaardip ilimagaa.

Canadami nannut pisarineqarsinnaasut ungasinngitsukkut 28 procentimik amerlineqarmata, ukiumut 500-it sinnerlugit pisarineqarsinnaalerput.

Nannunniartartut amerlasuut USA-meersuupput, tassanilu naalakkersuisut tammajuitsussatut piniakkat eqquteqqusaajunnaassanersut eqqarsaatigilersimavaat.