-Uani pisut ilungersunartut tusagassiorfitsigut saqqummiunneqartut tunngavigalugit Jens Napãtôq oqaloqatigaara paaseqatigiillutalu tunuarniuteqarnissaa aaqqissimavarput. Tamanna aatsaarluinnaq nalunaarutigaa uangalu naalakkersuisut siulittaasuattut taamatut qinnuteqaataa akueralugu nalunaarutigaara.
Taama oqarpoq naalakkersuisut siulittaasuat Hans Enoksen, naalakkersuisunut ilaasortap Jens Napãtuup tunuarneranut atatillugu Radioavisimi toqqaannartumik apersorneqarnermini.
Hans Enoksen aperineqarami qanoq ililluni taama annertutigisumik atuineq arajutsineqarsinnaanersoq akivoq:
-Aningaasanik aqutsineq naalakkersuisoqarfiit namminneq iluminni ingerlattarpaat. Aamma sinaakkutassat suunersut ilisimareerpaat. Uani aningaasat pineqartut ilassinninnerinnarmut tunnganngillat aammali angalanernut hotelinilu najugaqarnernut tunngasuullutik.
Naalakkersuisut siulittaasuata erseqqissarpaa pisoq naalakkersuisunut imaannaanngitsuusoq ilungersunartuullunilu.
-Tamanna tunngavigalugu Jens Napãtôq oqaloqatigaara tunuarniuteqaqqullugulu piumaffigalugu.
Naalakkersuisut aqagu ataatsimiissapput naalakkersuisullu tunuartup akisussaaffii akunnerminni agguataassallugit, naalakkersuisunut ilaasortamik nutaamik toqqaanissap tungaanut tigummigallagassatik.
