Naoto Kan pernaammik oqalugiarpoq

Japanimili ulluni makkunani ersaartaannissaq pissutissaqarpianngikkaluarpoq, tassami Japanip massakkut aningaasaqarniarnera pitsaanngimmat.

Japanip ministeriunertaava inatsisartuni siullermeerluni oqaaseqarnermini Japanip aningaasarsiornikkut ajutoorluinnalernera Grækenlandimisulli pilersutut takussutissartalik mianersoqqussutigaa. Ministeriunerullu ullumi oqalugiarnermini aammattaaq aningaasarsiornikkut sukaterinissaq oqaatigaa.

Tassami tamanna pissuteqarmat ukiut amerlaqisut ingerlaneranni Japanimi naalakkersuisuusartut Japanimi aningaasarsiornermi ajalusoornerit tamaasa makiteqqittarsimammatigik, pisortat aningaasaataasa Japanip sineriaata eqqaani aqqusinersualiornernut sapusiornernullu atorneqartarnerisigut. Taamaaliorsinnaasarsimapput, tassami allakkerisarfeqarneq aningaasarpassuarnik pigisaqarmat Japanimiullu tamarmik meeqqamik ilinniarnissaannut utoqqalinissaannullu ileqqarutissanik paarsillaqqissuummata taakkualu tigoriaannaasarlugit.

Aaqqiissutissaq suna Kan-ip ullumi missiliuusiorneraa Asger Røjle aperineqarami akivoq:

- Nerisassanut atugassat amigarpata taava aningaasartuutit ikilisinneqassapput, tamannalu partiip demokratiskiusup siorna atuutilersup aallartereersimavaa, imaluunniit aningaasatigut isertitaqarnerunissaq, tamatumanilu akileraartarnerup allanngortinnissaa toqqaannanngikkaluamik taavaa, amerlanerillu momsimik qaffaaniartutut pasillerpaat, tamannali erseqqissumik taanngilaa, politikki taamaattoq Japanimi nuannarineqanngimmat.

Siullermeerluni oqalugiarnera qanoq paasisaqarfigineraa Røjle aperineqarami akivoq:

- Oqartoqarsinnaavoq erseqqissumik oqalugiartoq, oqalugiaataalu siuliininngarnit imaqarnerusoq, aalajangersimappalunneruvoq partiillu tapersersortini iperarniarlugit, iluatsitsissagunilu qaammatip tulliani qinersinissami ajugaasariaqarluni.

Siulimininngarnit atanerungaatsiassanersoq aperineqarami akivoq:

- Manna iluatsikkuniuk taava ilimanarpoq ukioq taanna anigorumaaraa.