Nanuusaaqqat Marsimi inuusinnaapput

Ilisimatuussutsikkut paasisat nutaat aamma paasinarsisippaat, nanuusaaqqat Marsimiilerunik ”angerlarsimasutut” aamma misigissasut.
novembarip 25-at 2008 09:07

Uumasuaqqanik nunarsuarmiit ullorissamut Marsimukartitsisoqassamaartoq ilisimatuunit ilimasaarutigineqartoq tallimanngormat Radioaviisimi oqaluttuaraarput.

Uumasuaraarannguit pineqartut taaguuteqarput nanuusaaqqat – taakku millimeterisut mikititigaat, maattoorsuullutik, nunattalu Avannaani ilisimatuunit nassaarineqarsimallutik.

Marsimi annertoorsuarnik sermitaqartoq radarikkut takuneqarsimavoq. Sermit pujoralammit ujaraaqqanillu asseqqapput, pujoralak ujaraaqqallu ukiut 200 millionit missaanni tamaaniissimallutik.

- Tamanna Kalaallit Nunaata nassaarineqariataarneranut assersuunneqarsinnaavoq, John Holt, University of Texasimeersoq, ilisimatuunut nutaamik paasisaqartunut siuttuusoq oqarpoq.

Sermit paasineqaqqammersut imertaqartorujussuugunarput, taamaammat inunnik ulloriarsuarmut aappaluttumik taaneqartartumut ilisimasassarsiortitsinissaq navianaateqarunanngilaq. Imerli ujaraaqqat minnerpaamik 10 meterit ataaniimmat anguneqarsinnaanersoq suli nalunarallarpoq.

- Imeq angusinnaajumallugu assaassuarmik atorfissaqartitsisariaqassaagut. Taamaattumillu qanoq ililluta taamaattumik Marsimukaassisinnaanerluta misissortariaqarparput, Amerikamiut avataarsualiartitsisarfianni, Nasami, ujarassiooq, Jeffres Plaut, aviisimit Los Angeles Timesimit apersorneqarluni taama oqarpoq.