Nanumik pilersitsisoq nersornaatisisussatut siunnersuutigineqarpoq
Tamatumani pineqarpoq Wonder Awardit arfineq-pingajussaannik taaneqartartoq, arnanullu nukissalerujussuarnut uummatigissunullu nersorinninniutaasoq.
Taamatut unamminermi naliliisartut pingaartumik pingaartissimavaat Krissie Berthelsen Winbergip nunatsinni inuusuttorpassuarnut maligassiuisuunera.
- Qanoq iliuuseqarnerup qanoq iluaqutaatigisinnaassusia takutippaa. Paqumigisat akisussaaffimminnillu qimarratiginnittut atuunneranni akisussaaffimmik tigusinissani sapiuffiginngilaa. Tamatuma Kalaallit Nunaanni Danmarkimilu inuusuttunut maligassiuisunngortippaa, naliliisartut tunngavilersuumminni allapput.
Krissie Berthelsen Winberg sap. akunneranut 35 tiimit nammineq piumassutsiminik sulisarpoq, marlunnik nukangasunik meeraqarpoq uinilu peqatigalugu sutorniartarfimmik ingerlatsilluni - taamatullu peqataaffiginninnera naliliisartut aammattaaq maluginiarpaat.
- Ullutsinni sapiitsuliortunut inuttullu tunngasutigut suliassanik aallartitsiniartunut ilaavoq, ataqqiniarnissaanullu pissutissaqarluarluni, naliliisartut oqarput.
Krissie Berthelsen Winberg arnat allat marluk peqatigalugit siunnersuutigineqarpoq. Ajugaassaguni unammisitsinermi nittartagaq naapertorlugu illoqarfinni nunaqarfinnilu tamani naapittarfinnik pilersitsinissamut aningaasat atussamaarpai.
