Nanubørn aningaasarpassuarnik tunissuteqarfigineqartut
Aningaasarpassuit taakku atuakkap “Indlandsisen - 80 års klimaændringer set fra luften”-ip kalaallisut taasinnaasatta “Sermersuaq - silap pissusiata ukiuni 80-ini allanngoriartornera qulaanit isigalugu”, tunineranit sinneqartoorutaagallartunit isertitaapput.
Naalagaaffiup pinngortitaleriffiata katersugaasiviata atuagaq saqqummersitaraa, atuagarlu suliarineqaannalersoq aalajangiunneqarluni atuakkap tuninerani sinneqartoorutit ilanngarnagit Nunatsinni meeqqanut atugarliortunut ikiuiniarlutik suliniartunut tunniunneqassasut.
- Inuiaqatigiit suliaqarnitsinni tunngavigisatta utertitsiffigineqarnissaat kissaatigigatsigu. Taamaattumik Nanu Børnip suliniarnera pingaarutilik tapersersussallugu aalajangiupparput, 100.000 koruuninik tunniussinermut atatillugu professor Kurt H. Kjær atuakkamik aaqqissuisuusoq oqarpoq.
AAMMA ATUARUK Serminik iigartartunik ilisimatusartoq Ujarassiuumut nersornaammik tunineqartoq
Nunatsinni sermeqarfiit arlalissuit siornatigut ullutsinnilu assingi atuakkami takutinneqarput. Siornatigut assilisat 1933-mi assilisaapput taakkulu 2013-imi assileqqinneqarlutik. Atuagaq taamaalilluni Nunatsinni 1930-kkut kingornagut silap pissusiata allanngoriartupiloorneranik assitigut uppernarsaataavoq.
- 100.000 koruunit tunniunneqartut qujaruteqaavut aningaasallu ingerlanneqartunik inerisaaqqinnernut atorneqarumaarput soorlu meeqqanut illunut, meeqqat naleqassutsiminnik annerusumik misiginissaanik suliniutinik ineriartortitsinernut atoneqassallutik, Nanu Børnineersoq Charlotte Bæk Risbjerg tunniussanik tigusisuusoq oqarpoq.
Sermeqarfiit 1933-mit ullutsinnut allanngoriartorneri paasisaqarfiginerorusukkaanni, atuagaq Nunatsinni atuagaarniarfinni sapaatip akunnerata tullianit pisiarineqarsinnaalissaaq.
