Nanuaraq tusaamasaq

Nutaarsiassaqartitsiviup Ritzauip allaaseraa nanuaraq qaqortoq Knut kiguseriunnaarsimasoq. Nanuaraq taanna nunarsuarmi tusaamaneqalerpoq Berlinimi uumasuusivissuarmiitsillugu allakkanik nanuaqqap toqunneqarnissaanik siorasaarutinik imalinnik takkuttoqarmat nanuaraq Knut isumannaatsumut nuutsinneqartariaqalernerata kingorna.

Maannali isumannarunnaarsimasoq oqaluttuarineqartalerpoq:

- Knut pinnguaqqittalerpoq, sunalu tamarmi maanna ajunngilaq, uumasuusivissuarmi uumasut nakorsaat André Schüle taama issuarneqarpoq.

Unnersiutigineqarportaaq nanuaraq taanna marsip qaammataani sisamaannarnik qaammateqarluni avammut saqqummiunneqaqqaarmalli, ullut tamaviisa inuit 12.500 missaat Berlinimi uumasuusivissuarmut takuniaasarsimasut.

Uanilu sapaatip-akunnerata naanerani inuit 1000-lippassuit aamma takuniaasimapput, upernalernerani seqinertinnini qanoq igineraa takuniarneqartarluni.

Nanuaqqap nuannarineqarnera allaat ima ingasatsigilersimavoq, tysklandimi naalakkersuisut siuttuat Angela Merkel ullumi apersorneqarami apersorneqarnermini oqarsimavortaaq nammineq nanuaqqamut Knut-imut nuannarinnilluartut ilagigaanni.