Nanuaraq Knut nuannarineqaqisoq takusarneqassaaq
Uumasoq sapaatip akunnerani uani eqqartorneqarnerpaaq, nanuarannguaq Knut, tamanut Berlinimi Uumasuusivissuarmi sapaatip akunnerata naanerani aatsaavissuaq takutinneqassaaq.
Nanuarannguaq taanna qaqortoq arnaata ajattormagu Uumasuusivissuarmi sulisut nallittorpaat, uumasunillu illersuiniaqatigiit tamanna aalassassutigeqaat, oqarlutik, Knut toqukkaanni ajunnginnerpaassasoq, tassamigooq miluffittortinnera uumasunik naalliutsitsinerummat. Berlinimili Uumasuusivissuarmi pisortat aalajangerput Knut asattuunniarlugu – nuannarinnitserpassuisalu tamanna nuannaarutigeqaat.
Berlinimi aviisit, Bild aamma BZ Berlin, ullumi saqqummersut, nanuaqqap sapaatip akunnerinik 15-inik utoqqaassusillip assinginik plakatinillu quppernerit ulikkaartaarlugit ilanngussipput, allaaserineqartunullu ilaavoq, Knut tassaasoq, nanuaraq Berlinimi ukiut 30-t sinnerlugit ingerlaneranni inunngortoq. Knut pillugu aamma nittartagaqarpoq, misilittagai tassani atuarneqarsinnaallutik, videolianillu aamma inniminniisoqarsinnaavoq. Knutip ullorsiutai aviisimi Tagespiegelimi aamma malittarineqarsinnaapput, allaallumi allaffigineqarsinnaalluni. Knutiaraq inequnartoq, ”Cute Knut” nittartakkakkut takujumaneqangaarmat Berlinimi Uumasuusivissuup nittartagaanut isertoqarsinnaajunnaarallarsimavoq.
