Nanuaraq Knut isertitsissutaalluartoq

Nanuaraq Knut Berlinimi uumasuusivissuarmut inuppassuarnik ussagartitsivoq. Inuit katillugit 200.000-t qanittumiit ungasissumiillu nanuaraq taanna qaqqorissoq qituttunnguanillu meqqulik marsip qaammataani takusarsimavaat, tassa marsimi uumasuusivissualiartartut marloriaataat.

Aviisi Süddeutsche Zeitung allappoq, aningaasanut piginneqatiginnissutit nalingi qaffariarujussuarsimasut, Berlinimi uumasusivissuarmut piginneqatiginnissutit nalingat 67 procentimik januaarip qiteqqunneraniilli qaffassimalluni.

Knut Berlinimi uumasuusivimmi siorna decembarimi inunngorpoq, marlulissat aappaattut, arnaatali akueriumasimanngilai marluliaqataalu ullut sisamat qaangiutiinnartut toquvoq. Knut karsimut kissassimaartitamut pisinneqarpoq, Tysklandimilu uumasunik illersuiniaqatigiit Knutip toqutiinnarneqarnissaa piumasarigaluarpaat, oqarlutik, uumasup nujuartap taama alliartornissaa naleqqutinngitsoq.

Knutili asattuunneqarpoq – silaannaap kissatsikkiartorneranut Tysklandimi allaat ilisarnaatinngorluni – ”Sikoqanngippat aamma nanoqarnavianngilaq”, Tysklandimi avatangiisinut ministerip Knutip nuannarinnitserpassuinut oqarneratuut.

Knutip miluffittorluni alliartornini ajoqutiginavianngikkaa, uumasuusivimmi sulisut isumaqarput – qularutiginngilaammi Knut nanorsuanngoruni nannutut allatulli immikkukajaaq pissuseqarlunilu ulorianartigilerumaartoq. Maannalumi tassa Berlinimi uumasuuviup aningaasaqarneranut iluaqutaaqaaq!