Nanuaraq anaanassaarunneqarpoq
Pituffimmi tallimanngormat unnuaani nanuaraq eqqaavissuup eqqaaniilersisoq, qanoq pineqassanersoq nalornissautigineqarpoq.
Nanuaraq meterip missaannik angissuseqarpoq, anaanaminillu qimataasimanissaa ilimagineqarluni.
Ulluni qaninnerni nannunik takunnittoqarsimavoq, ilimagineqarporlu nanuaqqap taakkua ilagisimassagunaraat.
Nanuaraq inunnut ulorianarsinnaasutut nalilerneqanngilaq sillimanissarli pissutigalugu, eqqaavilerisoq eqqaavissualiassatillugu politiit pisortaata ilagisarpaa, eqqaavissuarlu illoqarfimmiit 2-3 km-nik ungasissuseqarpoq.
- Massakkorpiaq nanuaraq qanoq iliuuseqarfigissanerlutigu nalugallarparput. Tamanna paasinarsissaaq uumasut nakorsaanik, Namminersornerullutillu Oqartussaqartussanik oqaluussaqareerutta, Pituffimmi Politiit pisortaat John Hansen oqarpoq.
Nannunniarnissamut aalajangersakkat Oktoberip aallaqqaataaniit atuutilersut pissutigalugit, iliuuserisinnaasat killeqarput. Pituffimmi inuutissarsiutigalugu piniartoqanngilaq, Pituffimmilu politiit nalugallarpaat nanuaraq qanoq qimaatinneqarsinnaanersoq.
