Nanuaqqat nerisakilliorlutik toqusut
Nannut piaraasa uumaannarnissaannut ullut pingasut siulliit qanoq ingerlanersut apeqqutaasartorujussuuvoq, tamannalu aamma uumasuusivissuarmiittunut atuuttoq, aviisimi Nordjyske Stifttidendemi allaaserineqarpoq.
Nannup arnavissap Maliup piaqqani aallaqqaammulli nakkutigilluaraluarpai, milutsitsisarneralu ajornartorsiutitaqarpasigani.
Uumasunilli paarsisut ippassaq malugilerpaat, nanuaqqat assut nukillaangasut nerisakilliorsimarpasittullu. Taamaattumik piaqqat illumut eqqullugit kissassimaartilerpaat miluffittortillugillu.
Paarsisut naatsorsuutigisimagaluarpaat, nakkutigineqalernertik nakortissutigissagaat, kisianni tassa nalunaaquttap akunneri arlalialuit qaangiutiinnartut toqupput.
Nanuaqqat arnaat milutsitsigaluarluni immukilliorsimassasoq, uumasuusivimmi sulisut pasitsaappat.