Nanu Travel kommunimit tapiiffigineqarpoq
Illoqqortoormiut takornariarfissatut ilisimaneqaleraluttuinnarnera Illoqqortoormiuni takornariartitsivituaasumut Nanu Travelimut piumasaqaateqalersitsivoq.
Taamaattumik takornariartitseqatigiiffiup takornariaqarnermik ineriartortitsinera sullissinissamik isumaqatigiissusiornikkut kommunimit taperserneqarpoq.
Nanu Travelimit takornariartitsinerup ingerlalluarnissaa neriulluarnarpoq. Naak Islandimi qaqqap innermik anitsisup qullaatsitai pissutaallutik tikinngitsoortut amerlagaluartut 2010-mi takornariartut amerlassusii 2009-misut iinnangajapput.
Tamatuma saniatigut Air Icelandip Illoqqortoormiut takornariarfissatut 2011-mi nittarsaanneruniarpaa. Aamma Bubberip Illoqqortoormiut pillugit TV2-mut ilanngutassiai inunnit 1 millionit missaannit takuneqarsimasoq takornariaqarluarnissaanik neriulluarnartitsivoq.
Kiffartuussinissamik isumaqatigiissut malillugu Nanu Travelip sullissinermini ilaatigut takornariartitsinerup niuernerullu iluani ineriartortitsinissaq suliassarigai, aammalu kommuneqarfiup iluani takornarianik sullissisut allat suleqatiginissai, takornarianik sullissinermik suliaqarlutik suliffeqarfiit aallartisarnerannut tunngasunut siunnersuinissaq, takornarianillu angallassinermi ataqatigiissaarinissaq.