Nanu Børn aningaasannallattaalerpoq

Erinarsortartut Julie Berthelsen aamma Søs Fenger apeqqutinik TV2-p aliikkutassiaani ”Hvem vil være millionær”-imi akiuinerminni peqatigiiffik Nanu Børn 125.000 koruuninik pissarsissuppaat.

Peqatigiiffiup Nanu Børnip aningaasanik katersuiniarnini nangillugit Danmarkimi illoqarfiit ilaanni Greve-mi ikiuiniaqatigiiffik alla Lions Club Greve suleqatigalugu sapaatip-akunnerata tulliani Kalaallit Nunaannut tunngasunik sammisaqartitsinialerpoq.

Tusarnaartitsinerit, takutitsinerit, titartaallaqqinneqqusaatsitsinerit, kaffillernerit allanillu niuffatsitsinerit misigisassanut ilaassapput, ilaatigut Københavnip ilaanit Tranhuset-mit sanalukkat tuniniarneqassallutik, taama aviisimi Sermitsiami allaaserinnittoqarpoq.

Julie Berthelsenip erinarsornerata saniatigut erinarsoqatigiit Aqisseq aamma tusarnaartitsissapput.

Pissangassutaanerpaassagunarpoq eqqumiitsulianik akitsorterussinissaq, tassami Kalaallit Nunaannut tunngatillugu sapaatip-akunneqartitsinermi ullormi kingullermi qalippakkat allallu kusanartuliat tuniniarneqassapput, eqqumiitsuliortuullutik Jens Kromann, Aviaq Mørch, Mads Norlund, Julie Berthelsen aamma Grevemi najugallit arlallit.

Nittartagaq aqqutigalugu akitsorterussinermut peqataasoqarsinnaajumaartoq aaqqissuisut aamma oqaatigaat.

Aningaasat sinneqartoorutit Nanu Børn-ip suliniutaannut nakkartinneqassapput.

Grevemi Nanu Børnip Lions Club Greve-llu aaqqissuussinerat apriilip ulluisa 20-anniit 25-annut ingerlanneqassaaq.