Nanorujussuaq Illoqqortoormiunut qanillattortoq pisarineqaqqusaanngilaq
Nanorujussuarmik Illoqqortoormiunut qanillattortoqaqqippoq. Illoqqortoormiunulli nannutassiissutigineqartut 30-t tamarmik pisarineqareermata, nanorsuaq angutiviaq qimaatiinnarneqartariaqarsimavoq. Nanorujussuaq illoqarfimmit qimaatinneqareerami illoqarfimmiit 5 kilometerisut ungasitsigisumut pilluni seqinnisaajutigaluni sinerujoorpoq, borgmesterillu nannup toqunneqarsinnaanissaanik akuersissummik piniarnermut pisortaqarfimmit akissutisissiinerani innuttaasut unnunnissaanut ernumapput. Illoqqortoormiuni borgmesteri Erling Madsen ima oqaluttuarpoq:
-Uunartumi piniartut nanorujussuaq nunaqarfimmiittoq isiginnaaginnartariaqarsimavaat, nannutassiissutigineqartut 30-t tamarmik pisarineqareermata. Nanoq Uunartumeereerluni Illoqqortoormiut tungaannut ingerlavoq, snescooterinillu qimaasinneqarluni.
Borgmesterip nannup pisarineqarsinnaanersoq piniarnermut pisortaqarfimmut paasiniarsimagaluarpaa, akineqarsimavorli nannutassat tamakkerneqareermata nanoq pisarineqaraluaruni unioqqutitsinertut isigineqassasoq.
Nunaqarfimmi nannup angalaarfigisaani atuartut lejrskolertut ippassaq angalaarsimasut aamma oqaluttuarineqarpoq.