Nanortallip umiarsualivia qaartiterutissanik ulikkaarpoq

Nanortaliup Umiarsualiviata eqqaani maannakkorpiaq container-it marluk qaartiterutissanik ulikkaartut uninngapput. Qaartiterutissat guld-tisiorfimmi ”Nalunami” atorneqartussaapput, sikorsuilli ajornartorsiutaammata pram-imik qaartiterutissat aaneqarsinnaanngikkallarput, taamaattumillu ujaqqerivimmiitinneqarput illoqarfimmiit 500 meter-inik ungasissusilimmi. Nanortalimmi politimester-iusup, Niels Nyvang Nielsen-ip oqaatigaa, isumannaallisaaneq ajoquteqanngitsoq, taamaattumillu tamanna ernumassutigineqassanngitsoq.

Qaartiterutissat ujaqqerivimmi uninngasut ulorianaateqanngillat, sooruna ulorianarsinnaapput aatsaat qaartinneqarunik, qaartinneqassangunimmi dynamit-inik ilallugit aatsaat qaarsinnaapput soorunami innermik aamma ikuallanneqarunik qaarsinnaapput maannakkulli inissisimaffiat ikuallajasuunngilaq containerit saviminiusut iluanniikkamik aammalu maani illoqarfimmi qaartiterutissat allat assigalugit paarineqarput. Illoqarfimmi innuttaasut oqarfigiinnassavakka ernumassuteqaqqunagit eqqissisimalluaannassasullu.

Qaartiterutissat marlunngormalli talittarfimmiissimapput. Maannakkut Prammi ”Nalunameersoq” sikorsuartigut appakaanniarsarivoq aallerluni, iluatsissappallu ullumikkut qaartiterutissat tiguneqassapput.