Nanortallip kommunia politiinut tunniunneqarput

apriilip 13-at 2005 10:40

Nanortallip kommuniata meeqqat inuusuttuaqqallu ikiorneqarnissaat pillugu inatsisartut peqqussutaat unioqqutitsisimaneraa politiit misissortussanngorpaat.

Nuummi politimestereqarfiup uppernarsarpaa Nanortalimmi nakorsaanerup Nanortallip Kommunia politiinut tunniussimagaa, kommunip meeqqanut sumiginnakkanut suliassanik kinguartitsisarsimanera pillugu.

Nakorsaanerup Rune Jakobsen-ip suliassat arfineq pingasut tunngavigalugit Nanortallip Kommunia unnerlutigaa, ukiuni ataatsimiit arfineq marlullu akornanni uninngatitsisimasutut.

Bjørn Bay politiit qullersaqarfianeersup ilisimanngilaa, politiit qaqugu suliassaq naammassissanerlugu.

- Suliassaq misissorneqaqqaartussaavoq inatsisilerituunillu nalilerneqaqqaartussaalluni, Bjørn Bay oqarpoq.

Nakorsaaneq politiinut tunniussivoq qaammatit arlallit politikerit atorfillillu ajornartorsiutinik oqaloqatiginninniaraluarnermi kingorna.