Nanortallip borgmesteria qinigaasinnaanini annaavaa

Siumut sinnerlugu Nanortallip kommuniani borgmesterip Tage Frederiksenip qinigaasinnaanini annaavaa, tamannalu pivoq, qinigaasinnaassuseq pillugu ataatsimiititaliap aalajangerneratigut.

Tage Frederiksenip pinerluttulerinermi inatsit § 30, immikkoortoq 2 unioqqutissimammagu qinigaasinnaanini annaavaa.

Tage Frederiksen atorfimmini suliassanik annertuumik isumaginninnginneq pillugu juulip 14-ianni 16.000 koruuninik akileeqqusaasimavoq, inuttaatalu tamanna akuersaarsimammagu qinigaasinnaanini maanna annaavaa. Qinigaasinnaassuseq pillugu ataatsimiititaliaq sinnerlugu siulittaasoq, nunatta eqqartuussisuunera Søren Søndergård Hansen taama allappoq.

Tage Frederiksen politeeqarfimmi pisortatut 2003-mi pinerluttulerinermut inatsit tunngavigalugu suliassat saqqummiuttariaqartut arlallit Nanortalimmi politeeqarfiup kiileriani sikaavimmut toqqorsivimmut toqqorsisimanerminut, ilaatigut kinguneralugu suliassat misissuiffigineqaqqissimannginnginnerat malersorneqarsimannginnerallu tunngavigalugit, Tage Frederiksen Politimesterimit akileeqquneqarsimavoq.

Tage Frederiksen radioaviisimut oqarpoq Qinigaasinnaassuseq pillugu ataatsimiititaliap aalajangiinera eqqortuunngitsoq. Tamanna pissutigalugu Tage Frederiksen eqqartuussisuserisuni attaveqarfigisimanerarpaa. Aalajangiinermut tunngasunut Nanortallip Kommuniani borgmesteritut qinigaasinnaajunnaartoq oqaaseqarumanngikkallarpoq.

Siornatigut borgmesteriusimasoq, Siumumeersoq Kristine Raahauge, kommunalbestyrelsimut upernaaq qinersinermi Siumukkunni qinigaanerpaat tulliattut inissippoq, taanna 1993-imit 1997-imut Nanortalimmi borgmesterioreersimavoq. Kristine Raahaugeli radioaviisimut pisoq pillugu oqaaseqarumanngikkallarpoq, kommunalbestyrelsimi immikkut ittumik ualiartoq ataatsimiittoqalersorlu.

Kristine Raahauge-p saniatigut borgmesterip tullia siulleq, Inuit Ataqatigiinneersoq Debora Kleist oqaaseqartinniaraluaratsigu iluatsinngilarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat