Nanortalimmiut isertitaqqortunerulerput

Nalunami guultisiorfik Nanortalimmiunik pisuunnguallatsitsivoq. Kalaallit Nunaanni naatsorsueqqissaartarfiup kisitsisaatai kingulliit naapertorlugit Nanortallup kommuniani isertitat agguaqatigiisillugu 8,4 procentinik qaffariarpoq. Kalaallit Nunaata sinneranut naleqqiullugu Nanortalimmiut isertitaat tamaasillutik qaffariarnerpaajupput. Nanortallup kommuneani agguaqatigiisillugu isertitat qaffariarnerannut pissutaatinneqarput, Nanortalimmiut Nalunami sulisorineqarnerat, guultisiorfiullu Nanortalimmi sullivinnik niuertarfinnillu atuinera.

Isertitat akileraaruteqaataasussat aamma Kalaallit Nunaata annersaani qaffariarput. Illoqarfinni 4,4 procentinik nunaqarfinnilu 3,8 procentinik.

Tassani maluginiagassaavoq Nanortallip nunaqarfiini qaffariaat malunnarnerpaajulluni 10,7 procentiummat. Ingerlalluaannartoqanngilarli. Kalaallit Nunaat tamaat qissimikkutsigu Qaanaaq, Aasiaat, Ivittuut aamma Kangaatsiaq isertitatigut kinguariarfiupput.