Nanortalimmiu "Robin Hood" eqqartuussaalerpoq

Angut suliffeqanngitsoq Nanortalimmeersoq, Danmarkimi BRF Bankimit kontumi nalunaarutaanik apriilimi nassiussarsisimasoq pillugu eqqartuussineq, Nanortalimmi ullumi suliarineqassaaq.

Aningaasat 1.3 millioni koruuninit ikinnerunngitsut kontomut ikineqarsimasut angutip tupaallaatigeqisaminik paasivaa.

Angut BRF Bankimut sianerpoq paasiniarlugu tamanna eqqortuunersoq, tamannalu bankimit uppernarsarneqarpoq.

Angut ukiorpassuarni klasselotterimi eqquiniaasarsimavoq. Taamaattumillu isumaqarluni eqqukkat tassaanngaanneersuussasut, erniinnarlu nammineq Kalaallit Nunaanni kontuminut aningaasat nuunneqaqqullugit banki qinnuigalugu.

Tamatuma kingorna festerneq, angutip taassuma Robin Hoodimik ateruseqalissutaa, aallartippoq.

Angutip 450.000 koruunit sapaatip akunnerini pingasuni atorpai. Umiatsiannguamik qarasaasiamillu pisivoq, ilaqutaalu tamarmik nutaanik mobiltelefonitaarlutik, Brugsenimi pisiniat qamutaat inunnut atorfissaqartitsisorisaminut immerpai, aqqusinermilu inunnut aningaasanik amigaateqassangatitaminut aningaasanik agguaalluni.

Sapaatilli akunneri pingasut qaangiummata nuannisarneq qaangiuppoq. BRF Bankimi inuup normuata kukkusumik toortarneqarsimanera aningaasallu allamukartuusut paasineqarmat.

Ullumi nalunaaqutaq ullo'qeqqata qeqqanut suliassaq kiisami eqqartuussivimmi suliarineqalissaaq.

Angutip ulluni 60-ini pineqaatissinneqartunut inissiisarfimmiititsinneqarnissaa unnerluussisup piumasarigaa, vicepolitimester Morten Nielsen oqarpoq.

Advokatfuldmægtig Ulrik Blidorf angummut illersuisuuvoq, taassumalu angutip pisuutinneqannginnissaa piumasaqaatiginiarpaa.

Nottinghamimisulli eqqartuussisuussaaq eqqartuussisoq Ib Lennert Olsen.