Nanortalimmi unittoortoqalinngilaq

Nanortalimmi inuussutissarsiornikkut unittoortoqalinngilaq, inuussutissarsiutinillu ineriartortitsinissamut suliniuteqartoqarpoq, Nanortalimmi sulisitsisut peqatigiiffiata inuussutissarsiornikkut unittoortoqarnissaanik ernumaneranut borgmesteri Kristine Raahauge eqqissisaavoq. Kristine Raahauge:

- Assassortut suliassaaleqinerannut ukiuunerani suliassat pilersaarusiorlugit suli naammassineqannginnerat peqqutaavoq. Massakkullu pilersaarusiorneq ingerlavoq, piareerpat suliariumannittussarsiuussisoqassalluni.

Aalisakkeriviup siornali matusimanera assut malunnarnerarpaa.

- Soorunami ajornartorsiortitsivoq, aalaisartut tunitsivissaqanngillat tassanilu sulisinnaasut suliffissaqanngillat. Aaqqiiniartoqarporli, piginnittut ingerlateqqinniarnagu aalajangermata nammisortut soqutiginnittut saaffiginninniuupput, tunisassiorsinnaanermullu akuersissut maanna utaqqiinnarneqarpoq, fabrikkillu ukioq manna ammaqqinnissaa anguniarneqarpoq, Raahauge oqarpoq.

Sanaartornikkut ukioq mannamut ukiunullu tulliuttunut arlariinnik pilersaaruteqartoqarmat illoqarfimmi assassorlutik namminersortut suliassaqarluassasut borgmesteri oqarpoq. Suliassat aasartinnagu aallartinneqarnissaat neriuutigigitsik oqarpoq.

Nanortalimmi sulisitsisut peqatigiiffiat isumaqarpoq guultisiorfik illoqarfimmi ineriartortitsinermut annertunerusumik iluaqusiisimanngitsoq. Tassunga borgmesteri akerliliivoq.

- Guultisiorfiup aallartinnissaa ukiorpassuarni utaqqisimavarput aallartimmallumi kommunemi kaaviiaartitat annertusipput akileraarutitigullu malunnaatai namminersortunut tupput, sanaartortitsinissamut aningaasaliissutit amerlimmata.

Guultisiorfimmi suliareqqiivimmik 50-inik sulisoqartussamik pilersitsiniarluni suliniarnerit aallartereersut Nanortalimmilu aalisartunut piniartunullu atortussaarniarfik matoqqammersoq namminersortunit maanna tiguniarneqartoq Kristine Raahauge oqarpoq. Takornariaqarmik siuarsaaqataanissamut suleqataanissamullu kommune piareersimasoq aamma oqarpoq.