Nanortalimmi ujaasineq nanginneqarpoq

Kuussuaq sarfarissutut ilisimaneqarluartoq ikaarnialersillugu, inuusuttut marluk Nanortaliup eqqaani sapaatiummat kuugussaapput, periarfeerunneqarlutillu. Ajunaarsimanissaat ilimagineqarpoq.

Taamaakkaluartoq nukappissat sapiiserniartuartarput. Nanortallip kommuniani isumaginninnermik pisortaq, ullunilu makkunani ajunaarsimasut qanigisaanik ikiorsiilluni ulapileruttortoq, Peter Sonberg, oqarpoq sapiiserniartarnerit navianarluinnartut.

- Pinngortitarput nuannersorujussuusinnaavoq, kisianni aamma navianarsinnaalluni, taanna assut oqaatigerusuppara, mianersoqqussummik tuniserusuppunga, taannalu pimoorullugu tigoqqunaraluaqaaq, Peter Sonberg oqarpoq.

Nanortalimmi politiit ittuat, Niels Nyvang Nielsen, Radioaviisip aallartinngilaattaani oqaloqatigigatsigu, ilisimatitsivoq, inuusuttunik marlunnik ujaasineq suli kinguneqanngitsoq, ujaasinerlu ullaaq-manna aallarteqqinneqartoq.

Atuartorpassuit meeqqerivinneersullu, aamma allarpassuit, sapaatit akunnerini makkunanerpiaq nunatsinni kangerlunnut tammaarsimaariartarput, arlaatigulluunniit aasarsioriartarlutik.