Nanortalimmi ujaasineq naammassisoq: 45-nik ukiulik nammineq angerlartoq

Angut Nanortalimmi maqaasineqartoq sapaatip-akunnera sinnerlugu ujaarineqareerluni ajorani ippassaq angerlarpoq.

Kalaallit Nunaanni Politiit tusagassiuutinut nalunaaruteqarlutik taama paasissutissiipput.

Angut 45-nik ukiulik kingullermik qaqqamukartoq juunip pingajuanni takuneqarpoq.

Tammaaneqalinnginnermini nikallungalluni qanigisaminut oqaatigisimavaa, ullullu marluk qaangiummata juunip ulluisa tallimaanni ujaarineqalerpoq.

Illoqarfiup politiivi, Issittumi Sakkutooqarfik innuttaasullu ujaaseqataapput. Silalli atoruminannginnera pissutigalugu ujaasineq qasseeriarluni unitsinneqarpoq.

AAMMA ATUARUK Nanortalimmi ujaasineq nanginneqartoq

Angut ajorani nammineerluni ippassaq angerlarpoq. Qasuvorli, taamaammat politiit apersuinissartik ullumimut utaqqissuppaat.

- Angut ippassaq oqaloqatigisinnaanatigu nalilerparput, Camilla Palmann politiini attaveqaqatigiinnermut tusagassiisarnermullu sulisuat KNR-imut oqarpoq.

Angutip sumiissimanera politiit suli ilisimanngilaat. Tamanna kingusinnerusukkut apersuinermi paasineqassangatinneqarpoq.