Toqqorsivimmit assi

Nanortalimmi tunillagaasoq peqqisseqqittoq: Nunarput coronartueruteqqittoq

Nunarsuarmi nunat arlallit tunillaasoqarsimaneranik kisitsisaataat qaffakkiartuinnartut Kalaallit Nunaat coronartueruteqqippoq. Nanortalimmi tunillanneqarsimasoq peqqissisimasoq Naalakkersuisut nittartagaanni takuneqarsinnaavoq.

Nunatta nakorsaaneerata nittartagaa nun.gl naapertorlugu Nanortalimmi coronamik tunillanneqarsimasoq maanna peqqissisoq, nittartagaq nun.gl naapertorlugu paasissutissat taamaapput.

Ilisimasassarsiortut umiarsuaata Hetairosip Tuluit Nunaanninngaanniit Island aqqusaarlugu Nanortalimmukartumut ilaasoq, Islandimi tunillanneqarsimanerminut misissortissimavoq, tunillanneqarsimanngitorlu paasineqarluni.

Nanortalimmiilereernerminni ullut tallimat qaangiummata tunillanneqarsimasinnaanermut peqqissaavimmi misissortikkami, tunillanneqarsimasoq juulip 24-iani paasineqarpoq.

Tamaakkaluartoq tunillanneqarsimanini Nanortallip peqqissaaviani paasineqareertoq mattussaanissamut inassutaasut malissimanngilai illoqarfimmilu angalasimalluni.

Nanortalimmi inuuttaasut coronartoqalernerani isumakulupput. Nakorsaaneq Henrik L. Hansen tamaammat isumakulunnartoqarpallannginerarlugu tusagassiutitigut nalunaarpoq, taassuma tunillaasimanissaa ilimananngimmat innuttaasunut qanillinikuunngimmat.

Ilisimasassarsiortut umiarsuaat 15-inik inuttaqarpoq marlunnillu ilaasoqarluni. Pineqartup misissortinnera tunillagaasimaneranik ersersitsimmat, umiarsuarmi ilaasut sinneri angalanertik unitsitseqqullugu qinnuigineqarsimapput nunatsinnilu innuttaasunut attaveqarnaveersaaqqullugit.

Nanortalimmi tunillanneqartoq tunillanneqareernermini illoqarfimmi angalaarsimagaluartoq, Naalakkersuisut nittartagaat malillugu taanna Nanortalimmi tunillaasimanngilaq.

AAMMA ATUARUK Coronamik tunillatsissimasoq Nanortalimmiittoq ajunngilaq ersiuteqaranilu

Nunatsinni coronamik tunillatsissimasut katillugit 14-iupput. Taakkunani inuit 11-it Nuummeerput, ataaseq Aasianneersoq, ataaseq Ilulissaneersoq ataaserlu Nanortalimmeersoq. Tamarmilli peqqissereerput.

Nunatsinni coronavirusimut misissorneqarsimasut maannamut 5999-iusut, nittartakkakkut www.nun.gl-imi takuneqarsinnaapput.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7448
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 18-iat 2020 nal. 10:45