Nanortalimmi Siumukkut nassuiaateqarput

Nanortalimmi Siumup siulittaasuisa akissuteqaatigaat sooq Inuit Ataqatigiinnik suleqateqarumajunnaarsimanerlutik.

- IA-mi eqqissisimasoqannginnera piffissami sivisuumi maluginiarsimavarput. Akunnerminni ajornartorsiuteqarnerat kikkut tamarmik arajutsisimanngilaat, tamanna suleqatigiinnermut nanertuutaasimavoq, taamattuminguna nammineq iliuuseqarnissarput toqqartariaqarsimagipput, taama oqarpoq Nanortalimmi Siumumi ippassaq tikillugu siulittaasoq Peter Sonberg.

Siumumi siulersuisut ippassaq ataatsimiinneranni Peter Sonberg Nanortallip kommuniata inunnik isumaginnittoqarfiani allaffimmi pisortatut suliassaqarpallaarnini tunngavigalugu tunuarpoq.

Nanortalimmi Inuit Ataqatigiit ataatsimiititalimi siulittaasuuffik Siumukkormiumit taarserneqarsimanera massuaatigivaat, tassungalu atatillugu Peter Sonberg oqarpoq tassani ilaasortaatitaasoq Inuit Ataqatigiinniit anilluni Siumumut nuussimasoq.

Annassi Kleist Karolussenip Siumumi ilaasortaalerneratigut kommunalbestyrelsemi inissat qulingiluat ilaat tallimat Siumukkormiunit inuttaqalerput.