Nanortalimmi saarullinnut tunitsiveqalissanersoq aggustimi paasinarsissaaq

-Aalisagaaterpassuaqarpugut, sumulli tunisinnaavagut? Nanortalimmi oqartussat taama Aalisartut Piniartullu Kattuffiannut KNAPK-mut aperaat. KNAPK-mit taqqavani tunitsivissaaleqineq naluneqanngilaq, sukkanerusumilli iliuuseqartoqarsinnaannginnerarpaat, apeqqummik akisussaq tassaammat Arctic Green Food.

Akuersissutinik utaqqisaqarneq pissutigalugu Arctic Green Foodip Nanortalimmi suliffissuata aallartinnissaa suli utaqqineqarpoq, tunitsiviliisinnaanerli ajornakusuussasoq, pisortaq Tønnes Berthelsen oqarpoq.

- Fabrikki tassa maannakkut ulluni makkunanerpiaq tassa Danmarkimi inuussutissalerinermi nakkutilliisoqarfimminngaanniit misissorneqarpoq, taavalu tassa qanittuarakasikkut aalajangertoqassaaq qanoq akuerineqarsinnaanerosq. Tassa sulerisinnaanissaa qallunaat aalajangissavaat, taannalu aalajangerneq EU-mut ingerlatinneqassaaq, EU-llu akuersissut tunniutissavaa. Naatsorsuutigaarput aggutsip ingerlanerani pisinnaassagipput.

Tønnes Berthelsen aamma oqarpoq, umiarsuit marluk sinerissatsinni saarullinnut tunitsivittut atorneqartut, taakkulu maanna Napasup eqqaani aamma Qeqertarsuatsiaat avannaatungaaniitinneqartut. Aappaa juunip 28-iata tungaanut Qaqortup eqqaaniitinneqarsimavoq taamanilu Nanortalimmiunit tunitsivigineqarsinnaasimalluni. Umiarsuup tunitsiviup aappaa aggustip aallaqqaataata tungaannaanut nunatsinniittussaavoq, maannalu piginnittuinut isumaqatigiinniutaavoq piffissaq attartorfiusoq sivitsorneqarsinnaanersoq, taamaalilluni Nanortalimmi sulisinneqarsinnaassammat.

-Umiarsuarmut ilaanneqartartut kujataani siornaminngaanniit siuariarfiupput, kisianni una Nanortallip eqqaa eqqarsaatigissagutsigu nunaqarfiit marluk ammatikkallaluarpagut Narsarmiuni aamma Tasiusami. Kisianni taqqavani tunisat annertugisassaanngillat. Kisianni kalerrinneqarpugut Nanortallip eqqaani saarulleqarluartoq, sissami assut takussaasimagut, taamaammat sukumiisumik umiarsuaatillit oqaloqatigivagut kujataanut illikartitsinissaq siunertaralugu. Paasisaqarutta pineqartut kalerrikkumaarpagut.

Arctic Green Foodip pisortaa Tønnes Berthelsen taama oqarpoq.