Nanortalimmi RG-p suliffissua Arctic Green Foodimut tuniniarneqaraluarpoq

Nanortalimmi Royal Greenlandip suliffissua atortorissaarutaajagaq 4,2 million koruunilerlugu Royal Greenland-ip Arctic Green Foodimut tuniniaraluarmagu, decembarimi 2005-imi itigartinneqarpoq, naak aningaasat akiliutissat pigineqareersimagaluartut, taama oqarpoq Arctic Green Food-imi pisortaaneq Tønnes Berthelsen.

-Paasinarsigami aki isumaqatigiissutigereerlutigu atortutigut immikkut aningaasartuuteqartariaqartugut. Nioqqutissiorfik, tassa aalisakkerivik nioqqutissiorfinngorsinnaassappat, aalisakkerinermut atortunik pisinissat, aningaasat 1,5 -2 millionillu annerussuseqartut immikkut pisariaqartileratsigik, taakkulu missingersuusiatsinni imaaliallaannaq nassaarisinnaanatigit. Taamaammat siulersuisut aalajangerput pisiniarneq unitsinneqassasoq.

Apriilip ulluisa aqqarnanni Royal Greenlandip siulersuisuinik ataatsimeeqateqarnersi angusaqarfiunngippat qanoq iliorsinnaavisi?

- Neriuppugut angusaqassalluta, isumaqatigiissinnaasalluta. Isumaqarpunga periarfissat marluusut. Siulleq Royal Greenlandip akigitinniagartik apparsinnaappassuk, taava uagutsinnut angujuminarnerujussuanngussagaluarpoq. Ukua, aalisakkerinermut atortussanik pisinissarput eqqarsaatigalugu imaluunniit periarfissat appaattut, Naalakkersuisut akulerunnissaat pisariaqarpoq, uani uagut missingersuutitsinni nassaarsinnaannginnatta, taava immikkut tapiinerisigut fabrikkip ammarneqarnissaa qulakkeersinnaagaluarparput.

Royal Greenlandip siulersuisuini siulittaasoq, Paaviaaraq Heilmann, Kujataata Radioanut qanittukkut oqarpoq, pisoq pillugu oqaaseqaqqikkumanani. Inuussutissarsiornermut Naalakkersuisoq, Siverth K. Heilmann, oqarpoq, suliffeqarfissuit marluk pineqartut isumaqatigiissuteqarsinnaanngippata, piginnittutut fabrikki akikitsunnguanngorlugu pisiumasunut kikkunnut tamanut kaammattuutigisinnaassallugu.