Nanortalimmi kollegiassaaleqineqarpoq

Nanortalimmi ilinniartut inaannik, kollegianik, piaartumik pisariaqartitsisoqarpoq, taamaattumik Namminersornerullutik Oqartussani aningaasanik 1,2 mio. koruuninik kontonit allanit nuussisinnaaneq massakkorpiaq misissorneqarpoq.

Nanortallip Kommuniani ilinniartut inissaannik ukioq manna pisariaqartitsisoqarmat, Pisortaqarfitsinni kontot assigiinngitsut misissuiffigaavut, aningaasat 1,2 mio. koruunit ukioq manna kollegialiornissamut atugassat nassaariniarlugit, taama oqarpoq Ulla Broberg Ilinniartitaanermut Pisortaqarfimmi siunnersortaasoq.

Ulla Broberg-ip ilisimatitsissutigaa Naalakkersuisut piareersimaffigigaat ukiuni tulliuttuni kollegianik amigaateqalernissaq.

2007-imi Aningaasanut Inatsimmi 20 mio. koruunit Piareersarfiit kollegiassaannut atorrneqarnissaat siunnersuutaapput. Taakkunani ilinniartuusarput inuusuttut 15-niit 25-nik ukiullit.

2007-mut Aningaasanut Inatsisissaq akuersissutigineqassappat Upernavimmi, Uummannami, Tasiilami Nanortalimmilu sanaartortoqarnissaa siunnersuutigineqarallarpoq.