Nanortalimmi kina borgmesterinngussanersoq suli paasineqanngilaq

Tage Frederiksenimik taarsiilluni Nanortalimmi kina borgmesterinngussanersoq suli nalunaarutigineqanngilaq. Radioaviisip paasisai naapertorlugit ataatsimiinnissaq tassanngaannaq aalajangiunneqarpoq, taamaakkaluartorli maannamut suli aalajangertoqanngilaq.

Qinigaasinnaassuseq pillugu ataatsimiititaliap ippassaq tusagassiutinut nalunaarutigaa, Tage Frederiksen qinigaasinnaanani tallimanngornermi nalunaarfigineqarsimasoq. Nanortallip politeeqarfiani pisortatut sulinermini atorfimmini suliassanik isumaginninnginneq pillugu Tage Frederiksen juulip qaammataani pineqaatissineqarpoq.

Tage Frederiksen radioaviisimut oqarpoq Qinigaasinnaassuseq pillugu ataatsimiititaliap aalajangiinera eqqortuunngitsoq. Tamanna pissutigalugu eqqartuussissuserisuni attaveqarfigisimanerarpaa suliaq misissuiffigineqarniassammat.

Nanortalimmi kommunalbestyrelse taamaalinerani nutaamik borgmesterissarsiorpoq. Kommunalbestyrelsimut upernaaq qinersisoqarnerani Siumukkunni qinerneqarnerpaap tullia, Nanortalimmilu siusinnerusukkut borgmesteriusimasoq, Kristine Raahauge bormesterissatut ilimagineqarpoq.

Kommunalbestyrelsimili ilaasortanit qulingiluaasunit Siumut sisamanik ilaasortaatitaqarpoq, taamaalilluni partiip kisimiilluni kina borgmesteriussanersoq aalajangersinnaanngilaa. Borgmesterilu tunuartinneqartillugu isumaqatiginninniarnerit aallaqqaataaniit aallartittariaqarput.

Taamaattumik Nanortalimmi kina borgmesterinngussanersoq suli nalorninarallarpoq.