Nanortalimmi isumalluarput

Gultimik akuiaavimmik gultisiorfimmi Nalunami inissiinissamut Nalunaq Gold Mine A/S Aatsitassat pillugit Pisortaqarfimmut qinnuteqarsimavoq, piviusunngussappallu suliffissanik 30-nik pilersitsisinnaavoq. Akuiaavissaq 50 mio-it 100 mio. koruunillu akornanni akeqartussaavoq. Ullumikkut saviminissaq kultimik akulik Spaniami akuiarneqartarpoq.

Avatangiisit pillugit Nakkutilliivimmi, Danmarkimi Kalaallit Nunaanilu ujarassiornermi Miissuivimmi, Danmarkimi Avatangiisit pillugit Nakkutilliivimmi immikkullu ilisimasalinni allani qinnuteqaat tusarniaassutigineqareersimavoq.

Aatsitassat pillugit Siunnersuisoqatigiit maajip naanerani ataatsimiilerunik, qinnuteqaat akuerissanerlugu itiagartissanerluguluunniit naliiffigissavaat.

- Qulakkeereertarparput ukiut 3-t qaangiuppata aningaasaliissutivut matussuserneqarnissaat. Aningaasaliisarpugut neriuuteqaratta, Erik Andersen Nalunaq Gold Mine A/S-ip pisortaanera oqarpoq.

Mingutsitsinnginnissamut sillimaniarnermi pilersaarut, ippassaq unnukkut Nanortalimmi innuttaasunut saqqummiunneqartut innuttaasut naammagisimaarluarpaat.