Nanortalimmi innuttaasut Nalunaq pillugu saqqummiiffigineqartut

marsip 29-at 2006 14:49

Kuultisiorfimmi Nalunami kuultimik akuiaaveqalerpat, toqunartumik cyanid-mik saviminissamit kuulti avissaartinneqartalertussaavoq. Tamaalisoqarnissaa sioqqullugu Nalunami aqutsisut sukumiisumik isumannaallisaanissamut pilersaarusiorsimapput ippassaq unnukkut Nanortalimmi innuttaasunut saqqummiunneqartumik.

Ataatsimiigiat 70-it 80-llu akornanniipput. Ataatsimiititsineq naammassiartulersoq mingutitsisoqarsinnaaneranik apeqqut tusanaariat ilaasa isummerfigaat.

-Tusarnaareerlugu uanga ernumassuteqanngilanga. Nunarsuarmi arlalinni taama ittoqartoq oqaluttuarput, ikittuararsuillu kisimik ajoqusertartut, Ole Stach oqarpoq.

Saviminissaq malm ujaraaraaraanngorlugu aserortigaq, pinngortitap nammineq pigeriigaanik mineraalinik marlunnik akoqartoq igitassaq, kangerlummi immap 200 meterit sinnerlugit ititigisumut ruujorersuit aqqutigalugit eqqarneqassaaq. Tusarnaariat amerlanerit upperilerpaat mingutitsisoqassappat minnerpaaffimminiissasoq. Taamatut upperinnilersut ilagaat borgmester Kristine Råhauge.

-Nassuiaanneqarnerput aallaavigalugu paasinarpoq piumasaqaataasut qanoq annertutigisut, aammalu qinnuteqaataagallartup suliarinerani akissuteqaatini iluarsisassat, ilaatigut mingutsitsineq minnerpaaq siunertaralugu sulisoqarnissaa paasineratigut toqqissisimanartippara, Kristine Raahauge oqarpoq.

Cyanidi saliinermut atorneqaqattaartussaasoq innuttaasunut ataatsimiisitsinermi paasititsissutigineqarpoq, taannalu naafferartumik taarseqattaarnagu atorneqartartussaasoq, Kristine Raahauge-p ilanngullugu oqaatigaa.