Nanortalimmi atuartut angerlarsimaffiata sananeqarnera qulakkeerneqarpoq

Nanortalimmi atuartut angerlarsimaffiata sanaartornerata naammassineqarnissaa qulakkeerneqarpoq. Ineqarnermut Naalakkersuisup Miiti Lyngep Siumup Inatsisartunut ilaasortaatitaata Anders Olsenip § 37 naapertorlugu apeqquteqaataanut akissutaani tamanna erserpoq.
Allattoq Jaaku Lyberth, Simon Uldum
aggustip 21-at 2013 05:23

Sanaartornissamut pilersaarutaasoq malillugu atuartut angerlarsimaffiata sanaartorneqarnera juulip sisamaani naammassineqartussaagaluarpoq. Aningaasaliiniarnermili suliat sivitsortoorutigineqarsimapput. Aningaasaqarnermulli akileraartarnermullu ataatsimiititaliap ataatsimiinnermini kingullermi, nutarterinerup annertuup immikkoortuata aappaata suliariumannittussarsiuunneqarnissaa akueraa, tamannalu oktobarip qiteqqunnerani pinissaa ilimagineqarpoq, tamatumalu kingorna nerisarfiup illutassaata nutaap sanaartorneqarnissaa oktobarip naalernerani aallartinneqarsinnaassallu, Miiti Lynge paasissutissiivoq.

Pilersaarutillu malillugit ingerlasoqassappat suliaq marsimi naammassineqartussatut naatsorsuutigineqarsinnaavoq, illullu silataani suliassat kingulliit aappaagu aasakkut naammassineqarsinnaassallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq