Nanortalimmi akileraarut qaffariaannaavoq

Tassami Nanortallip Qaqortoq Narsarlu kattuteqatigisussaavai, illoqarfinnilu taakkunani marlunni akileraarut ullumikkut 28 procentiuvoq Nanortalimmilu 26 procentiulluni.

Taamaalillunilu Nanortalimmiut akileraaruteqarnerulertussanngussapput, tamannalu Nanortallip borgmesteriata qiimmaallaatiginngilaa.

- Akileraarutinut tunngatillugu Nanortalimmi akileraarut procentinik marlunnik appasinneruvoq. Nalimmassaasoqalerpat Nanortalimmiut akileraarutaat qaffattussanngussaaq, Kristine Raahauge oqarpoq.

Taassuma neriuutigaa tamatuma maluginiarneqarumaarnissaa, erseqqissaatigaalu Qaqortumi Narsamilu oqaloqateqartarnermini tamanna taakkartortarsimagini.

- Sulisut tigummiinnarnissaat aammalu sulisussat amerlisarnissaasa pingaaruteqassusiat neriuppunga qineqqusaartoqalerpat qinersereernerullu kingorna isiginiarneqarumaartoq, tassami akileraarut appasinneruppat taavalu sulisut amerlanerit pigineqalerpata matussusiisoqarsinnaagaluarmat. Tassami kujataani anguniagaraarput suliffiit amerlanerusut pigineqalernissaat taamatullu aamma inuit amerlaneruppata aamma akileraartartut amerlanerunissaat, Kristine Raahauge oqarpoq.

Nangilluni kommuninut allanut kattuttussanut sanilliussivoq. Maniitsup Sisimiullu kattunnissaat tikkuarpaa.

- Taakku akileraarutissaminnik nalimmassaareerput, appasinnerpaarlu aallaavigalugu nalimmassaapput. Taakkulu uagut unammillertussaagatsigit aaqqiiniarsarinitsinni taannartaa aamma eqqarsaatigilluartariaqarpoq, Kristine Raahauge oqarpoq.