Nanortalimmi aalisakkerivik tunineqarpoq

apriilip 12-at 2006 05:26

Nanortalimmi innuttaasut, minnerunngitsumillu aalisartut, eqqissiallassinnaanngorput.

Aalisakkanik taqqavani tunitsivissaqarniarnermi ajornartorsiutit maanna qaangerneqarput.

Royal Greenlandip aalisakkerivia, sivisuumik matoqqasimasoq, Arctic Green Foodimut tunineqarmat, ajornartorsiut qaangerneqarpoq.

KNI a/s Arctic Green Foodip aamma Royal Greenlandip siulittaasoqarfii, pisortatik peqatigalugit, ippassaq ataatsimiikkamik aalisakkeriviup pisiarinissaa isumaqatigiissutigaat. Nanortalimmi aalisakkerivik Arctic Green Foodip qangali pisiarerusussimavaa, akigitinniagarli 4,2 millioni koruuni, qaffasigisimallugu. Aalisakkerivik 2,7 millioni koruunilerlugu pisiariumallugu Arctic Green Food neqerooruteqaraluarpoq.

Fabrikkimut akigitinniagaq sivisuumik oqallisigereerlugu, aki 4,2 millioni koruunit 2,7 millioni koruunillu akorngisa missarluinnangajaaniittoq ippassaq isumaqatigiissutigineqarpoq.

Nanortalimmi aalisakkerivik 3,5 millioni koruunilerlugu pisiarineqarpoq.

Aalisakkerivimmi aalisakkanut atortussat maskiinat assigiinngitsut sinerissami aalisakkerivinnit assigiinngitsunit piffissap ingerlanerani pisiariortorneqassapput, sikorsuillu piffissami massakkorpiami ajornartorsiutaammata, sikorsuit qaangiuppata aalisakkeriviup atorluarneqarsinnaalernissaa neriuutigineqarpoq.