Nanortalimmi aalajangersakkat malinneqarput

Inuit Ataqatigiit Siumullu tallimanngormat isumaqatigiissutigaat Kristine Raahauge Nanortalimmi borgmesterinngussasoq, tamannali Demokraatit sinnerlugit kommnunalbestyrelsemi ilaasortap Peter Borg-ip isumaqatiginngilaa.

- Nammineerlunga kommunalbestyrelsemi inatsisit atuarnerisigut inatsisit ima paasivakka, borgmesteri tunuaraangat borgmesterisut tullersortaasoq ikkuttartoq, taamaammat taakkua malissagutsigit uanga viceborgmesterinngussaanga, Inuit Ataqatigiillu borgmesterinngortitsissallutik, Peter Borg, Demokraatit sinnerlugit kommunalbestyrelsemi ilaasortaq oqarpoq, nangillunilu;- Isumaga allanngussappat, qanorpiaq maleruagassaqarnersoq, inatsisilerituunit nassuiaassunneqartariaqarpunga, Peter Borg naggasiivoq.

Aalajangersakkat kukkusut Peter Borgip atuarsimagai, KANUKOKA-mi pisortaq Martha Labansen oqarpoq.

- Aalajangersakkani atuarsimavaa, borgmesteri sivikinnerusumi peqannginnerani inissittarnerit. Uanili pineqarpoq borgmesterip qinigaanerup sinnerani atajunnaarnera, taamaattumik kommunalbestyrelsep pisussaaffigivaa aalajangersakkat paragraf 8-miittut aqutsinermi inatsimmiittut atussallugit, tassalu borgmesterimik nutaamik, kommunalbestyrelsi qinersissaaq, Martha Labansen, KANUKOKA-mi pisortaq oqarpoq.

Namminersornerullutik oqartussani

Nunami namminermi pissutsinut allaffimmit aamma oqaatigineqarpoq Nanortalimmi naliginnaasumik borgmesterimik qinerseqqittoqassasoq.