Nanortalik unittooqqasoq
Nanortalimmi ukiualuit matuma siornagut kuultisiorfeqaleraluartoq, Nanortallip illoqarfiani inuussutissarsiornermut iluaqutaangaarsimanngilaq.
Taqqavani namminersorluni inuussutissarsiuteqarneq massakkut unittuujusavissimammat. Unittoornermut aalisakkeriviup siornali matunera sinersortaatinillu tikinneqartarunnaarneq annertuumik peqqutaaqataasut, Nanortalimmi namminersorlutik suliffiutillit peqatigiiffianni siulittaasoq, kommunimilu takornariartitsinermut pisortaq, Niels Tækker Jepsen oqarpoq.
- Nanortallip illoqarfiani inuussutissarsiorneq massakkut unittooqqalluinnartutut oqaatigisinnaavara. Aalisartoqarpugut tunitsivissaqanngitsunilli, aalisakkerivik siornali matoqqammat, NielsTækker Jepsen oqarpoq.
Nanortalimmi takornariaqarneq ingerlagaluarpoq, illoqarfilli sinersortaatinik massakkut tikinneqassaarmat Nanortalimmut takornariarniarlutik inniminniisimasut annertuumik ikileriangaatsiarsimasut Niels Tækker Jepsen, Nanortalimmi takornariaqarnermut aamma pisortaasoq oqarpoq.
- Nalunami kuultisiorfittaarnikuugaluarpugut, kisiannili kuultisiorfik illoqarfimmut annertunerusumik maannamut iluaqutaanngilaq, illoqarfiup inuusuttaasa ilaat arlaqanngitsut kuultisiorfimmi sulilersimanerat, akileraarutigullu kommunimut tassuunakkut iluaqusiinerat eqqaasanngikkaanni.
Nanortallip kommunia iluarsartuussinissamut sanaartornissamullu pilersaaruteqaraluartoq kisiannili sanasut namminersortut allallu sanaartornermik suliaqartut suli suliaqalersimanngitsut Niels Tækker Jepsen oqarpoq.
Nanortallup illoqarfiani aalisartunut piniartunullu atortuerniarfik aamma matunikuummat, piniartut aalisartullu atortussaminnik illoqarfinnut allanut nunaqarfinnullu pisiniartariaqartarput.
Niels Tækker Jepsenip malugisimanerarpaa innuttaasut akornanni isertitaasartut annikillinerat pisiniarfinni isertitaqarniarnikkut aamma malugineqartoq.
Niels Tækker Jepsenip tikkuarpaa, Nanortalimmut atatillugu suli iliuuseqartoqarianngitsoq, illoqarfinni allani soorlu Aasianni Ilulissanilu aalisakkerivinnik kinguppaleriffinnillu sivikinnerusumilluunniit matusisoqaraangat Naalakkersuinikkut iliuuseqartoqapallattarnera. Aamma tikkuarpaa Nanortalimmi namminersortut suliffeqarnikkut ineriartortsitsinissamut suleqataassallutik piareersimasut kommunilli suleqataarusunnera aallartitseqataarusussusialu aalajangeeqataasorujussuusut.
Nanortallip kommunia 1.300-it missaanni innuttaqarpoq. Nanortallip illoqarfiani sulisinnaasutut 977-it ullumikkut nalunaarsugaapput, taakkunannga 135-it maanna suliffissaaleqisuullutik.
