Nanortalik eqqartuussaalerpoq

Meeqqanik sumiginnaaneq pillugu Kalaallit Nunaanni eqqartuussineq siullerpaaq ullumi aallartissaaq. Niviarsiaqqamik 15-inik ukiulimmik sumiginnaasimasutut Nanortallip Kommunea Nuummi Landsretimi ullumi unnerluutigineqassaaq.

Niviarsiaqqap 15-inik ukiullip arnaa isumaqarpoq, Nanortallip Kommunea sumiginnaasimasoq, anaanarlu sinnerlugu Perorsaasut Ilinniarsimasut Peqatigiiffiat, PIP, eqqartuussivimmiissaaq.

Niviarsiaraq imminut toqunniarluni sioorasaarisarsimavoq, arni savimmik qunusaarsimavaa, angerlarsimaffimminillu peersitaasimalluni. Kommunili oqarpoq susinnaanani, niviarsiaqqap Danmarkimut efterskoleriartinnissaa akisuallaaqimmat. Tamanna 2005-imi pivoq.

PIP-p eqqartuussissuserisua, Henrik Karl Nielsen, isumaqarpoq, meeqqat pillugit Naalagaaffiit Peqatigiit aalajangersagaannut, aamma meeqqat inuusuttullu ikiorserneqartarnissaat pillugu Inatsisartut peqqussutaannut pisoq naapertuutinngitsoq.

- Meeqqat pillugit Naalagaaffiit Peqatigiit aalajangersagaannik pisoq una unioqqutitsinerussagaluarpat, Naalagaaffiit Peqatigiit Danmarkimi oqartussaasut qinnuigissavaat susoqarneranik nassuiaaqqullugit.

Ajorsassagaluarutta aamma taamatorpiaq pisoqassaaq, taava paasissutissanik Naalagaaffiit Peqatigiinnut nassitsissaagut, Danmarkimilu oqartussaasut piumaffigissavaatigut Kalaallit Nunaanni illoqarfinni susoqarneranik akissuteqaqqulluta.

Tamaanga killittariaqassagutta ajussagaluaqaaq, Kalaallit Nunaannili politikerit iliuuseqarnissaminnut periarfissaqarnikuugaluarput, inuilli eqqugaasut ikiorserneqanngillat.

PIP-p eqqartuussissuserisua, Henrik Karl Nielsen, oqarpoq. Nanortallip eqqartuussissuserisua isumaqarpoq suliassaq eqqartuussisutigoortariaqanngikkaluartoq, tusagassiuutitigullu malugineqarnissaq PIP-p taamaallaat anguniaraa.

PIP taarsiivigitikkusunngilaq, eqqartuussinerlu qanorluunniit inerneqassagaluarpat, Naalagaaffiit Peqatigiinnut pisoq saqqummiunniarpaat.