Nanortalik: Aalisakkerivik ingerlaqqilli

Nanortalimmi aalisakkeriviup ingerlaqqilernissaa, Alluitsup Paanilu raajaleriffimmut tulaassisussamik qulakkeerisoqarnissaa, kissaatigisani annerpaanut ilaasut Nanortalimmi borgmesteri Kristine Raahauge oqarpoq.

Naalakkersuisut siulittaasuata Hans Enoksen-ip, Ilaqutariinermullu naalakkersuisup Tommy Marøp Nanortalimmi Alluitsup Paanilu sapaatip-akunnerata naanerani ataatsimiititsisarneranni kissaatit tamakkua saqqummiunneqarput.

Nanortalimmi aalisakkerivik siornatigut Royal Greenland-imit ingerlanneqarsimasoq massakkut uninngaannarpoq.

Arctic Green Food-imut 4,2 million koruunilerlugu tuniniarneqarpoq, eqqarsaatigineqartunut ilaalluni Pilersuisoq suleqatigalugu ingerlanneqalissasoq, suliarli qanoq kinguneqassanersoq massakkut suli oqaatigineqarsinnaanngilaq.

Kilisaatip Polar Nataarnap Alluitsup Paani namminersortut raajaleriffianut tulaassuilernissaa Nanortallip kommunianit sulissutigineqartunut ilaavoq, Alluitsup Paanili talittarfiup mikivallaarnera aporfiulluni.

Kissaatit tamakkua saniatigut Nanortalimmi inissianik sanaartoqqilernissaq, kommunillu nunaqarfittaani illuliortoqaqqilernissaa aamma suliniutigigitsik Nanortallip kommuniani borgmesteri Kristine Raahauge oqarpoq.