Nanoq ulluni qulingiluani nalussimavoq

Nanoq arnaviaq Canadap avannaani immami ualerngup tarajuani 700 kilometerisut isorartutigisumik ullut qulingiluat atorlugit unigani nalussimavoq.
februaarip 01-at 2011 05:07

Tamatuma kingorna sikup sinaatigut qaammatini marlunni 1800 kilometerisut isortartutigisumik pisuppoq.

Nannup arnavissap taamarujussuaq nalulluni pisullunilu ingerlaarsimanera ilisimatuunit malinnaaffigineqarpoq. Nanoq taanna 2008-mi nassitsissummik GPS-imik atortulerneqarpoq.

Nannup ingerlaarfii, sumiiffigisaanilu atugassaritaasut paasiniarlugit nanoq nassitsissumik atortulerneqarpoq. Paasiniarneqartunut ilaavoq, sikup aakkiartornerata aammalu issittumi silaannaap kiannerulerata kingunerisaanik nannut ilaasa nunamiinnerulersimanerat.

Nannup arnavissap ingerlaarfigisimasaanik paasisat siornatigut ilisimaneqanngillat. Nannup ingerlaarsimaneranik siornatigut naatsorsuisoqarsimanngilaq aammalu taamatut isorartutigisumik ingerlaarsimasumik nalunaarsuisoqarsimanani.

Nannup taassuma isorartoorujussuakkut ingerlaarnermini timimi 22 procentia katappaa, aamma piaraata aqqut ingerlaarfik isorartooq tamakkerlugu ingerlaarfiginngilaa, tassami aqqutaani toqugami.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq