Nanoq tusaamasaq Knut toquvoq

Nanoq Knut, Tysklandimi tusaamaneqaqalunilu nuannarineqaqisoq, piaraaneranilu ilaatigut maani radioaviisimit malinnaaffigilluagarput, sisamaannarnik ukioqarluni toquvoq. Uumasuusivissuarmi paarsisua nutaarsiassaqartitsivimmut DPA-mut taama ilisimatitsivoq.

Uumasuusivissuarmi uumasunik paarsisup Heiner Klös-ip Knut uumasuusivissuarmi nannut inaanni tasiliami puttasoq naammattoorsimavaa.

Knutip suna toqqutigisimaneraa suli paasineqanngilaq.

Nanuaraq inequnarluinnartoq Knut 2006-imi decembarip tallimaanni piaqqiarineqarmat, nunarsuarmiunit tamanit malinnaaffigineqalerpoq, ingerlaannarlunilu nuannarineqalerluni.

Knut taamanikkut arnaminit soqutigineqanngimmat, uumasunik paarsisut miluffimmik immuttortittarpaat. Knut tassaavoq, Berlinimi uumasuusivissuarmi ukiuni 33-ni nannuni uumasuutigineqartuni siullerpaalluni piaqqiarineqartoq.

Knut pissutaalluni Berlinimi uumasuusivissuarmut takuniaasartut amerlatserujussuarput, Knutilu Amerikamiut atuagassiaata mutinik sammisaqartup tusaamasaaqisup Vanity Fair-ip saqqaani taamanikkut assitaliunneqarluni.