Nanoq Trawl suli misissuiffigineqarpoq

Kilisaat Nanoq Trawl Danmarkimi Hanstholmimi bagmandspolitiinit ataasinngormat unnukkut ikiffigineqartoq suli misissuiffigineqarpoq. Pisat tamarmik oqimaalutarneqassapput.

Hjørringimi eqqartuussivimmit misissuinissamut akuersissut atorlugu bagmandspolitiit kilisaammut usingiartumut Nanoq Trawlimut ataasinngormat unnukkut ikipput. Nunatsinni politimesterip Steen Thomsenip piumasarisimavaa marlunnik misissusoqassasoq.

Siullertut nalunaarutigineqartumit amerlanernit raajanik useqarnersoq misissuisoqassaaq aappaattullu qarasaasiat pappilissallu 2004-mi '05-imilu allattuiffigineqartut misissuiffigineqarniassammata arsaarinnissutigineqarnissaat piumasarineqarsimasoq Nanoq Trawlimik januaarip aallaqqaataani piginnittuulersup Polar Seafoodip siulersuisuini siulittaasup, Kjeld Holmstrupip oqaluttuaraa.

Politiit misissuinerminni paasissutisseerusunngillat, politimester Steen Thomsenili oqaluttuarpoq paasissutissiissalluni siusippallaartoq sulimi aamma misissuisoqarmat.

Radioavisimiilli paasisagut naapertorlugit naalakkersuinermik suliaqartut aalassassimaarutigisimavaat siorna apriilimi nalunaarusiaq ”Anklager om illegalt fiskeri” -kalaallisut ”eqqunngitsumik nalunaarsuilluni aalisarnerup nalunaarusiarineqarnera”-nik taaneqarsinnaasoq - tunngavigalugu kilisaammi misissuisoqarpoq.

Nalunaarusiaq isertuunneqaqqaartoq, tusagassiortunit septembarimi paasineqarpoq. Taamaanikkullu raajat tunineqartartut ikinaarlugit nalunaarutigineqartarnerat, pisassat peqquserluutigineqartarnerat, kukkusumik raajat akitsuuserneqartarnerat avammullu tunisat eqqunngitsumik nalunaarusiarineqartarneri paasineqarput.

Paasinnittoqarmalli politiit misissuillutik aallartipput, misissuisoqarnerani naalakkersuinermik suliaqartut oqallisigaat sooq nalunaarusiaq isertuunneqarsimasoq.

Politimesterip Steen Thomsenip ilisimatitsissutigaa bagmandspolitiit sisamanngorpat kilisaammik misissuinerat naammassissagitik.