Nanoq Trawl arsaagaavoq

Kilisaat Nanoq Trawl Danmarkimi Hanstholmip umiarsualivianut ataasinngormat usingiariartorluni tulammat politiit arlalissuit niuffiorput. Tamatuma kingorna pisat, qarasaasiat pappilissallu arsaarinnissutaapput.

Pisassat sinnerlugit kilisattoqarneranik pasitsanneq tamatumunnga tunngaviuvoq tamannalu maani nunatsinni misissuiffigineqarpoq.

Politiit misissuinerminni paasissutisseerusuppianngillat, politimester Steen Thomsenili oqaluttuarpoq, nammineq noqqaassuteqarnermi kingorna danskit politiivi misissuinermi ikiuussimasut, aviisi De Bergske Blade allappoq.

Nanoq Trawlip qaavani qerititsivianilu pisanik oqimaalutaallutik kilisattoqarpallaartoqarsimanersoq paasiniarlugu politiit misissuisimapput.

Nanoq Trawl Polar Seafoodimit pigineqarpoq. Tassani siulersuisuni siulittaasoq Kjeld Holmstrup oqarpoq, politiit pisanik aalajangersimasunik arsaarinninnissaminnut piginnittuusimasullu pisarisartagarisimasaasa allattuiffiinik misissuinissaminnut akuersissummik nassarlutik misissuisimasut.

- Malittarisassat malillugit kilisannikuugatta ernumanngilanga. Kilisaat pisiarinngikkallaratsigu susoqartarsimanersoq qanoq pisoqartarsimanersoq ilisimasaqanngilanga, Kjeld Holmstrup oqarpoq.

Politimester Steen Thomsen Danmarkiliarmat maanna oqaaseqartissinnaasimanngilarput.