Nanoq timmisartoqarfimmiittoq toqunneqartariaqarsimavoq
Arfininngornermi ullaakkut nalunaaqutaq 08.25 timmisartunik mitsitsisarfimmiit nalunaarutigineqarpoq nanoq akunnittarfiup eqqaani takuneqartoq.
Timmisartoqarfimmi aqutsisuugallartup Gert Dan Friisip suleqatini allat peqatigalugit nanoq timmisartorfimmit aallaqqaammut qimaatinniarsaraa.
- Timmisartumut mittarfiup ungataanut siullermik qimaatipparput. Mittarfimmit meterit 40-t 50-illu missaanni ungasitsigisumut pigami unippoq nunamullu nallakarluni. Nammineq qimagunnissaa neriuutigalugu nalunaaquttap akunnerata affaa tulliuttoq utaqqivugut, Get Dan Friis oqaluttuarpoq.
Kisianni piffissaq qaangiummat nanoq iniminit nikissimanngitsoq Mittarfeqarfinni sulisut paasivaat.
- Sioorasaarutitut igeriarnerit arlallit igeriunneqarmata nanoq qimaalluni aallarpoq, kisianni 100 meeterit missaani ungasitsigisumi unippoq utimullu aallarluni. Aamma sioorasaarutitut igeriarnerigaluit soqutiginagit ingerlaannarpoq, Gert Dan Friis oqaluttuarpoq.
Piffissap taamaasinerani nannumik toqutsinissamik akuersissut timmisartunik mitsitsisarfimmit pissarsiarineqareersimavoq.
- Timmisartup tikinnissaanut minutsit 45-innanngortut nannup toqunneqarnissaa aalajangerpara, Get Dan Friis oqaluttuarpoq.
Nanoq, angutiviaq marlut missaannik ukiulik, seqqornermi ataatsimi pisarineqarpoq. Neqaa Illoqqortoormiunut aallarunneqarpoq tassanilu utoqqaat illuanni najugalinnut neqeroorutigineqarluni. Kisianni, nannup neqaata trigineqarnissaa ernumagigamikku utoqqaat qujaannarsimapput.
