Avatangiisit

ASSIT Nannup piaraatalu pisarineqarnerat politiinit suliarineqartut

Nanoq arnaviaq taassumalu piarai marluk Aasiaat eqqaani tallimanngormat pisarineqartut, pillugit Aasianni politiit suliaqarput, Julie Senderovitz Bendtsen Qaasuitsup Politiivineersoq taama paasissutissiivoq.
Allattoq Jaaku Lyberth
januaarip 24-at 2018 06:51

 Nannut pingasut taakkua Aasiaat eqqaanni tallimanngormat pisarineqarput.

Nannut piaraat eqqissisimatitaapput,  Nannunik illersuineq piniarnerlu pillugit Namminersorlutik Oqartussat nalunaarutaat naapertorlugu, nanoq arnaviaq ataatsimik amerlanerusunilluunniit piaqqisartut Nunatta oqartussaaffigisaani eqqissisimatitaalluinnarput.

Nannut piaraat eqqissisimatitaapput utoqqaassusiat apeqqutaatinnagu arnaminnik pinngitsuuisinnaanngitsut, pineqarlutik.
Nannut pingasut arsaarinissutigineqarallarput Namminersorlutillu Oqartussanut tunniunneqarlutik,  Julie Senderovitz Bendtsen KNR-imut taama paasissutissiivoq.

Kalaallit Nunaanni nannut tallimat tallimanngormat pisarineqarput.

Kangaatsiami nanoq meeqqerivimmut qanillattortoq aallaaneqarpoq, taamatuttaaq Ittoqqortoormiini nanoq illoqarfimmi angalaareerluni utoqqaat illuanni igalaakkut ilummut isigisoq aamma pisarineqarpoq.

Kangaatsiami nanoq aallaaneqarpoq innuttaasunut ulorianartorsiortitsimmat imminullu illersorniarluni  pisarineqarluni.
Nanoq Ittoqqortoormiuni pisarineqarpoq, Ittoqqortoormiini nannuttasaqarmat.
Nannut Aasiaat eqqaanni pisarineqartut pillugit Aasianni politiit annerusumik paasissutissiisinnaanngillat pineqartut pillugit suli paasiniaasoqarmat.

 

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk