Nanoq Ittoqqortoormiit ungataatigoortoq Ittoqqortoormiini piniarnermik nakkutilliisumut, Erling Madsenimut, sapaatiummat ullaakkut siarngutigineqarpoq. Assi: Mikkel Anike

Nanoq Ittoqqortoormiiniit unguugaasoq

Piniarnermik nakkutilliisoq, Erling Madsen, sapaatiummat ullaakkut nalunaaqutaq arfineq-marluk qaangilaaraa sianerfigineqarami ilimagisimanngilaa inuunini ulloq taanna navianartorsiortissallugu.

- Qanoq sivisutigisumik imaaniissimanerlunga oqaatigisinnaanngilara. Qaqinneqannginninnili immaqa minutsit pingasut missaanni imaaniippunga. 

Ittoqqortoormiini piniarnermik nakkutilliisoq, Erling Madsen, sapaatiummat misigisaminik taama oqaluttuarpoq. Nanoq Ittoqqortoormiit ungataatungaatigoortoq Erling Madsenimut ullaakkut siarngutigineqarpoq. Piniarnermillu nakkutilliisoq makipiloorpoq. 

- Sianeriitsiartoq qamuteralallunga orniguppunga. Pisoqarfimmullu tikikkama takunnittoq, sianertoq, oqaloqatigaara. Taassuma ilisimatippaanga, nanoq sikukkut qimaasoq. Oqaloqatigiinnitsinnili malugeqqipparput uteqqissimasoq, Erling Madsen oqaluttuarpoq.

Talittarfiup tungaatigut ingerlaarpoq, sioqqukkiartorlugulu qamuteralallunga ornippara immaqa meterit 20-30-t tungaannut ungasitsigalugu unillunga.

Taamaattumik nanoq qimaatinniarlugu qamuteralalluni sioqqukkiartorpaa.

- Talittarfiup tungaatigut ingerlaarpoq, sioqqukkiartorlugulu qamuteralallunga ornippara immaqa meterit 20-30-t tungaannut ungasitsigalugu unillunga. Alakkariarmat illuinnarsuummik kalerrisaarummik qimaatinniarlugu tungaanut igippunga. Siullermik igikkama soqutiginngilaa, aappassaanik igikkama arriitsunnguamik avammut saalluni aallarpoq, Erling Madsen oqarpoq.

Siku sequmittoq

Navianartuerukkallarporlu, Erling Madsenilli aatsaat annakannajaarujussuartussanngorluni ilisimanngilaa.

- Ullaajummammi taartorujussuuvoq. Aalajangerpungali qamuteralallunga sikumut avalassallunga, nalunnginnakkumi siku taassuma tungaaniittoq sapaatit-akunnerit pingasut qaangiummatali sikuareersoq. Uneriarlunga seqersartora tigoriarlugu nanoq ujarniarlugu seqeqattaarpunga, aallarialerlungalu malugivara qamuteralaat kiviartulersut. Sukkasuumik aallariaraluarpunga, kisianni aallariarnerma sukkanerusumik kiviartortiinnarpai. Pisseriaraluarpunga, eqqarali aamma sequmisimammat imaanut tullunga malugaara, taavalu uanga isillunga.

AAMMA ATUARUK Nannut kaattut 50-init amerlanerusut russit illoqarfiata eqqaaniittut

Angutip nanoqarneranik kalerriisup Erling Madsen sissaminngaanniit qujanartumik alapernaarsorpaa. 

- Timmut suaarpara kalerillugu qamuteralaat kivisut uangalu isillunga, ingerlaannarlu malugivara arpalluni aallartoq. Avalatsinnani qujanartumik qamutit eqqaanniissimagami. Tassa taakkunannga qamutinit allunaasamik tiguseriarluni aallarpoq. Kisianni uanga imaaniippunga immaqa minutsit pingasut missaanni, taava imaaninngaannit qaqippaangaa, Erling Madsen oqarpoq.

Ukioq manna nanoqarpianngilaq

Nanumut igeriarpallannerit Ittoqqortoormiinit arlalinnit tusaaneqarsimapput, aarlerisaarisullu qamuteralattumit parsiarneqalertorsimallutik.

- Nissukka qeratangaarmata nikuissinnaanngilangaluunniit. 

Erling Madsenip oqarnera naapertorlugu silap allanngorarnera sapaatiummat annilaarnartumik pisoqarneranut pissutaalluinnartut ilagaat. 

AAMMA ATUARUK Nannumik saassunneqartoq: Niaqora qaqqoriaraluarpaa

- Tassaana una ukiassarnerput aamma eqqumiilaarami. Sikuaraluarluta sila allanngoraangat saaveqqittarami. Ernumavallaarnanga avalatserpunga – arfininngormammi alakkarterakku tamarmi qaqqoqiinnaviugami, Erling Madsen oqaluttuarpoq.

Tassami piniarnermik nakkutilliisoq nannunik aasaq qaangiuttoq unguugassaqarpallaarsimanngikkaluarpoq. 

- Taamaallaat aggustimi marloriarluta tikittooraluarpugut, takkuteqqittoqaranili. Aasaq manna siornatigorniit eqqissisimanarneroqaaq, Erling Madsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat