Nanoq Beer pillugu apeqqutit allat

Inatsisartunut ilaasortaq Anda Uldum Demokraatineersoq suliffeqarfik akiliisinnajunnaartoq Nanoq Beer pillugu Naalakkersuisunut § 37 naapertorlugu apeqquteqarpoq. Uldumip paaserusuppaa Namminersorlutik Oqartussat Nanoq Beerip royaltymik akiliisimannginnera politiinut suliakkiissutigisimanersoq.
Allattoq Peter Troelsen
oktobarip 31-at 2013 07:51

Anda Uldumip, Nanoq Beer pillugu siornatigut apeqquteqarsimasup paaserusuppaa Nanoq Beer ukiuni 2012-imi 2013-imilu imermik avammut nioqquteqarnissaminut akuersissuteqarsimanersoq. Aammattaaq nilammik imermillu avammut tunisassiornissaq siunertaralugu atuineq pillugu Inatsisartut inatsisaanni  § 29 imm. 2, akuersissumik pereerluni royaltymik akiliinngitsoortumut pillaammik akiligassiisinnaatitaasoq, Naalakkersuisunit malinneqarsimanersoq paaserusuppaa.

- Tupinnakuluppoq ingerlatseqatigiiffik kalaallit nunaata ernganik avammut tunisassiornissamut akuersissummik peqartoq royaltymik akiliinissamut piumasaqaatinik unioqqutitsisimappat Namminersorlutik Oqartussat susimanngisaannik. Innuttaasut soqutigaat Nanoq Beerimut, Greenland Venture aqqutigalugu ilaatigut Namminersorlutik Oqartussanit pigineqartumi pisut paaseqqissaarnissaat aamma siulersuisuni siulittaasoq ingerlatseqatigiiffimmilu pisortaq politikeriummata nuimasut Namminersorlutik Oqartussanit sallaannerusumik pineqarsimanersut aamma paaserusunneqarpoq, Anda Uldum Naalakkersuinut apeqquteqaatini taama tunngavilersorpai.