Nanoq arnaviaq Vilma Aalborgimi toqusoq
Sapaatit akunnerit marluk matuma siorna Vilma Tysklandimit Rostock Zoomit Aalborgip uumasuusivianut nuunneqarpoq.
Ullumilu pingasunngornermi uumasuusivimmi sulisut tupassutigeqisaannik toqusimavoq.
- Tupaqqaqaagut. Ullut 14-iinnaat maanniinnissaa naatsorsuutiginngikkaluarparput. Peqqiilliornerata paasineqarneraniit anerningerneranut pisoq sukkasoorujussuuvoq, Aalborg Zoologiske Havemi sulisoq Rikke Kruse DR Nordjyllandimut oqarpoq.
Uumasunik paarsisut Vilmap peqqippasinnginnera ullaap tungaa malugisimavaat.
Aalborgillu uumasuusiviani nanoq 14-inik ukiulik misissorneqarniassammat uumasut nakorsaat aggersarneqarsimavoq.
Nannup peqqissusaa ajorseriarujussuarsimavoq qanorlu pinngitsoq toqusimalluni.
- Nannup timaa qarasaalu misissorneqassapput, Rikke Kruse oqarpoq.
Misissuinerit inerneri sapaatit akunnerisa marluk ingerlanerini piariissangatinneqarput.
//Ritzau