Alaskap kitaani naggueqatitta Inuppiaat nunaqarfianni Walesimi nanoq inunnik marlunnik toqutsisimasoq, Alaskami politiit nutaarsiassaqartitsivimmut AP-mut ilisimatitsipput.
Nannup arnamik nukappiaqqamillu ukiukitsumik toqutsinera Walesimiit politiinut ippassaq marlunngornermi ualikkut kalerriutigineqarsimavoq.
- Nanoq nunaqarfimmiissimavoq inunnillu malersueqattaarsimalluni. Arnap nukappiaqqallu ukiukitsup nannumit saassunneqarnertik toqqutigaat, politiit oqaluttuarput.
AAMMA ATUARUK Ingikitsulimmi takornariaq nannumit saassunneqarami ajoqusertoq
Nanoq saassussisoq Walesermiut ilaannit aallaammik toqunneqarsimavoq, misissorneqarmallu perlilersimasoq paasineqarpoq.
Nunaqarfik alianartumik taama eqqugaasoq oqartussanit assigiinngitsunit orninneqarpoq.
Alaskami nannut inunnut upannittarnerat qaqutigooortuuvoq.
Nunaqarfimmi Point Layimi angut 1990-imi nannumit aamma toqutaasimavoq.
Sikusarnera silap pissusiata allanngoriartorneratigut allanngormat nannut nunamiinniarnerusalersimasut, Alaskami uumasorsiuut oqaatigaat.