Nanoq Aalborgimi marlulivoq
Aalborgip uumasuusiviani nanoq arnaviaq ippassaq marlulivoq. Aatsaavissuarlu nannup uumasuusivimmiittup piaqqineranik filmiliaq tamanut takusassiarineqarsinnaanngortoq, Aalborg Zoop-p pisortaa Per Christiansen nittartakkaminni oqaluttuarpoq.
Allattoq Najaaraq Egede
novembarip 30-at 2009 17:21
Nanoq arnaviaq Malik - taamammi ateqarpoq, maani nunatsinni Malik nukappiaqqanut atiugaluartoq, Danmarkimi nannumut arnaviamut atorsimavaat - taanna ippassaq marlulivoq, aappaatalu piaqqiarinera illunnguusap silataani pisoq filmiliarineqarsinnaasimavoq.
Malik qulingiluanik ukioqangajalersoq aatsaat piaqqivoq, piaqqanilu paarilluarai, uumasuusivissuarmi uumasunik paarsisoq unnersiorpoq.
Piaqqat arnaallumi Aalborg Zoop nittartagaani malittarineqarsinnaapput, nittartagaq tassaalluni www.aalborg-zoo.dk.
Nannup arnavissap Maliup piaqqiani siulleq ungaluukkap iluani piaqqiaraa, illunnguusamullu eqquteriarlugu kingorna nalunaaquttap akunneri marlussuit qaangiummata aappaa piaqqiaralugu.
